చింతల మానేపల్లి సెప్టెంబర్ 18:
కొమురం భీం ఆసిఫాబాద్ జిల్లా చింతలమానెపల్లి పోలీస్స్టేషన్ పరిధిలో పలు ప్రాంతాల్లో పశువులను అక్రమంగా తరలించిన కేసుల్లో ఐదుగురు నిందితులను పోలీసులు అరెస్టు చేసి కోర్టులో హాజరుపర్చగా, న్యాయస్థానం రిమాండ్ విధించినట్లు ఎస్సై ఎం. కమలాకర్ తెలిపారు. జూలై 21న కర్జలి గ్రామ సమీపంలో మహీంద్రా జైలో వాహనంలో పశువులను అక్రమంగా తరలించిన కేసులో మహారాష్ట్రకు చెందిన A4 నిందితుడు కృష్ణ అలియాస్ రాజును అరెస్టు చేశారు. అలాగే ఆగస్టు 11న ఆడపెల్లి గ్రామంలో పాల వ్యాన్లో పశువులను అక్రమంగా తరలించిన కేసులో కాగజ్నగర్కు చెందిన A1 ఇనాయత్ ఖాన్ను అదుపులోకి తీసుకున్నారు. కోర్సిని గ్రామంలో సరైన పత్రాలు లేకుండా పశువులను తరలించిన కేసులో బెజ్జూరు మండలం సలుగుపల్లికి చెందిన A1 ఇప్ప అంజయ్య, మహారాష్ట్రకు చెందిన A2 కొడుపే జితేంద్ర యశ్వంత్లను అరెస్టు చేశారు. దిందా గ్రామంలో ఎలాంటి పత్రాలు లేకుండా ఐదు ఎడ్లను అక్రమంగా తరలించిన కేసులో మహారాష్ట్రకు చెందిన గోలేటివార్ అశోక్ను పోలీసులు అరెస్టు చేశారు. ఈ ఐదుగురు నిందితులను కోర్టులో హాజరుపర్చగా న్యాయస్థానం రిమాండ్ విధించినట్లు పోలీసులు తెలిపారు. పశువులను తరలించే సమయంలో తప్పనిసరిగా సరైన పత్రాలు కలిగి ఉండాలని, నిబంధనలకు విరుద్ధంగా పశువుల అక్రమ రవాణాకు పాల్పడితే చట్టపరమైన చర్యలు తప్పవని ఎస్సై ఎం. కమలాకర్ హెచ్చరించారు. పశువుల అక్రమ రవాణాను అరికట్టేందుకు పోలీసుల తనిఖీలు కొనసాగుతాయని తెలిపారు.
