పోరు తెలంగాణ అక్టోబర్ 16: కొమురం భీం ఆసిఫాబాద్ జిల్లా ప్రతినిధి. కాగజ్‌నగర్: పట్టణాన్ని పరిశుభ్రంగా ఉంచుతూ ప్రజల ఆరోగ్య పరిరక్షణలో కీలక పాత్ర పోషిస్తున్న కాగజ్‌నగర్ మున్సిపల్ కార్మికులకు పెండింగ్‌లో ఉన్న పీఎఫ్ డబ్బులు రూ.1 కోటి 40 లక్షలతో పాటు, ఒక నెల జీతాన్ని వెంటనే చెల్లించాలని టీఆర్‌ఎస్ పార్టీ రాష్ట్ర అధ్యక్షులు దేవల వీరన్న సిర్పూర్ నియోజకవర్గ ఇన్చార్జ్ కావేటి సబిత మనోహర్ డిమాండ్ చేశారు. మున్సిపల్ కార్మికులకు తమ పార్టీ తరఫున మద్దతు ప్రకటిస్తూ, వారి సమస్యలను అధికారులు వెంటనే పరిష్కరించాలని కోరారు. పట్టణంలోని వీధులను శుభ్రం చేస్తూ, చెత్తాచెదారాన్ని తొలగిస్తూ, ప్రజలకు పరిశుభ్రమైన వాతావరణాన్ని అందించేందుకు మున్సిపల్ కార్మికులు ప్రతిరోజూ శ్రమిస్తున్నారని పేర్కొన్నారు. అలాంటి కార్మికులకు సకాలంలో జీతాలు చెల్లించకపోవడం, వారి పీఎఫ్ డబ్బులు పెండింగ్‌లో ఉండటం ఆందోళనకరమని అన్నారు. కార్మికులు తమ కుటుంబాలను పోషించుకోవడానికి నెలవారీ జీతంపైనే ఆధారపడతారని, జీతాలు అందకపోతే ఇంటి ఖర్చులు, పిల్లల చదువులు, నిత్యావసరాల కొనుగోలు వంటి అవసరాలను తీర్చుకోవడం కష్టంగా మారుతుందని తెలిపారు. ముఖ్యంగా పండుగల సమయంలో కూడా కార్మికులు పస్తులు ఉండే పరిస్థితి ఏర్పడటం బాధాకరమని ఆవేదన వ్యక్తం చేశారు. పట్టణాన్ని పరిశుభ్రంగా ఉంచే కార్మికుల సంక్షేమాన్ని అధికారులు విస్మరించకూడదని అన్నారు. కార్మికులకు రావాల్సిన పీఎఫ్ నిధులు రూ.1.40 కోట్లను, పెండింగ్‌లో ఉన్న ఒక నెల జీతాన్ని తక్షణమే చెల్లించేలా సంబంధిత అధికారులు చర్యలు తీసుకోవాలని డిమాండ్ చేశారు. మున్సిపల్ కార్మికుల న్యాయమైన సమస్యలు పరిష్కారమయ్యే వరకు వాళ్లకి అండగా నిలుస్తామని నాయకులు తెలిపారు. కార్మికుల శ్రమను గుర్తించి, వారి కుటుంబాలకు ఆర్థిక భరోసా కల్పించే విధంగా ప్రభుత్వం, మున్సిపల్ అధికారులు స్పందించాలని కోరారు. ఈ కార్యక్రమంలో టిఆర్ఎస్ పార్టీ నాయకులు మున్సిపల్ కార్మికులు తదితరులు పాల్గొన్నారు.
మున్సిపల్ కార్మికుల పెండింగ్పీ ఎఫ్, జీతాలు వెంటనే చెల్లించాలి. పండుగ పూట పస్తులు ఉండడం బాధాకరం. మున్సిపల్ కార్మికులకు టిఆర్ఎస్ పార్టీ అండ.
Date:
Share post:
